الرئيسية / التوصيات

#القمح_تقلت_عيدانه ...

2025/02/07

#القمح_تقلت_عيدانه ...

مزارعين الغلة الغاليين ... ديما وابدا هتكونو في القلب والعين .. ومن الفجر بكتب للناس الطيبين ...

كل اللى زرع غلة النص الاول من هاتور يعني اللى زرع من او شهر ١١ حتى ٢٥ منه ...

يركز ويقرأ ويفهم الكلام اللى جاي ده ...

#حافظ_على_قمحك

مع ان معظم أصناف القمح المنزرعة مقاومة #للرقاد ... لكن فى ظل ظروف مناخية "معانده" يجب العمل على حمايته من الرقاد ... وخاصة مع ما هو متوقع بداية من شهر امشير حدوث "هبات مؤقتة" من الرياح النشطة خلال أوقات متفرقة خلال هذه الفترة...

قبل ما اتكلم عن الرقاد خلينا نعرف أهمية الريات الأخيرة للقمح بالغمر ( الرية التالتة والرابعة والخامسة ) ... (واللى هيسأل عن الرية الأولى والتانية ، رية المحاياة (التشتية / الغسلة) ودي اللى بتكون على عمر 25 -30 من الزراعة وبيتحط فيها دفعة التسميد الأولى ، والرية التانية بعدها ب 20 -25 يوم وبيتحط فيها الدفعة التانية والأخيرة من التسميد الازوتي يعني المفروض على عمر 45-50 يوم من الزراعة) ....

خلينا نرجع نتكلم عن الريات المهمة :

#الرية_التالتة: وبيكون الميعاد المناسب ليها من 70 – 80 يوم من الزراعة وهي رية هامة جداً لتحضير الغلة للطرد القوي في التوقيت المناسب ودي مهم قوي نضيف معاها سلفات زنك مع فولفيك ...

#الرية_الرابعة: وبيكون ميعادها من 95 – 100 يوم من الزراعة وهي هامة جداً لاستكمال طرد السنابل وبداية امتلاء الحبوب ومهم جداً اضيف معاها نترات كالسيوم او اى صورة من صور الكالسيوم ولو مش متاح ممكن اضيف بوتاسيوم ( سلفات او نترات )

#الرية_الخامسة ( والأخيرة) : وبيكون ميعادها في الغالب من 120 – 125 يوم من الزراعة ودي مهم جدا جدا جدا اضيف معاها ما بين 10 – 15 ك سلفات بوتاسيوم مع الري في برميل ودي بتزود ما بين 2 - 3 أردب للفدان ...

#ءء########ءء

نرجع نتكلم عن #مشكلة_الرقاد ...

كل مزارعين الغلة عارفين يعني ايه الغلة ترقد بعد الطرد ... يعنى غم وسدة نفس ...

لان الرقاد خسارة في إنتاجية المحصول تقدر نسبتها بحوالي من 20 إلى 25 ٪ في كثير من الحالات، كما يعمل الرقاد في محصول القمح على صعوبة حصاد النباتات ويزيد من تكاليف الحصاد، كما تكون الحبوب الناتجة من نباتات القمح التي رقدت ضامرة وصغيرة، وكذا يكون لون التبن الناتج من تلك النباتات داكن وليس أبيض ...

#اسباب_الرقاد

*** أسباب وراثية "الصفات الوراثية للصنف "حيث توجد أصناف تميل للرقاد، وهذه صفة وراثية في الصنف نفسه، وخاصة الاصناف البلدية اللى ما زال بعض المزارعين يزرعونها ...

*** الزراعة في أحواض بالبدار (الزراعة على مصاطب بالسطارات او بالنقر بتكون اكثر مقاومة) ..

*** زيادة الكثافة النباتية فى الزراعة (يعني اللى زرع بمعدل تقاوي يزيد عن 70 – 75 كجم) ..

*** زيادة التسميد الأزوتى وخاصة اليوريا أو تأخير الدفعة الأخيرة لتكون اثناء الطرد والتزهير وخروج السنايل ... (يعني اضافة اكثر من 90 وحدة ازوت فى الاراضي القديمة أو اكثر من 120 وحدة فى الاراضي الجديدة) ...

*** الري على فترات متباعدة أو الري يليها سقوط أمطار ...

*** الري أثناء أو قبل هبوب الرياح مباشرة .... ودي أهم سبب ويزيد من الرقاد الأسباب السابقة.

عشان كده من هنا ورايح هنمشي على جدول المناطق والايام اللى ممنوع فيها الري (قدر الإمكان) حسب سرعات الرياح ...

مع الأخذ في الاعتبار ان هبات الرياح النشطة ديما بتبدأ مع الظهيرة أو اخر النهار .. عشان محدش ينخدع في هدوءها صباحاً..

( رحم الله دكتورنا واخينا الراحل عبد السلام المنشاوي )) ...

#ءء########ءء

خلي الكلام ده يوصل لكل مزارعين القمح لو سمحت واعمل مشاركة للمنشور وبلغ جيرانك ... تاخد اجر صدقة العلم ...

ربنا يحفظكم ويحفظ أرزاقكم من كل سوء

اعمل متابعة follow للصفحة ضروري ولمصلحتك ... 🙂

دكتور محمد علي فهيم

7 فبراير 2025

30 طوبة 1741

8 شعبان 1446