الرئيسية / التوصيات

مواعيد زراعة العروة الجديدة (الخريفية / الشتوية المبكرة 2024)

2024/08/27

الأعزاء الكرام ...

أهلاً وسهلاً بحضراتكم جميعاً ... طبعاً الوقت دخل علينا والكل منتظر يعرف المواعيد الآمنة لزراعة محاصيل العروة الجديدة ده غير شتل عروة الخضر وبساتين الفاكهة الجديدة ...

المواعيد دي ممكن تتغير شوية عن كده لأنها مواعيد بصفة عامة ... وديما قبلي بيكون بدري شوية في بعض المحاصيل زي البطاطس - الفاصوليا - البصل - الثوم ... ومتأخر في البنجر مثلا ...

واحيانا المواعيد نفسها ممكن تتغير في نفس المنطقة .. زي القمح مثلا لو الجو امتد فيه الصيف المتأخر في الخريف فيفضل ان يكون ميعاد الزراعة بعد 20 نوفمبر مع ان الميعاد الموصي به بعد 10 نوفمبر ... وهكذا

وطبعاً الجو السنة اكثر حرارة من العام الماضي بمعني ان أغسطس 2024 أعلى حرارة في المتوسط بحوالي 3-4 درجات عن أغسطس 2023 .. وده معناه ان الصيف الحالي اعلى حرارة ... يعني ارجع بذاكرتك للسنة اللي فاتت ولو زرعت محصولك مثلا في 20 تمانيه فازرع السنة دي في 30 تمانيه ولو زرعت في اخر تمانيه فازرع السنة دي في 10 تسعة ... وهكذا ..

والناس اللى استعجلت زراعة البطاطس قبلي والبنجر ومشاتل البصل قبلي والخرشوف بحري ... يركزوا معانا الفترة دي جدا لو سمحتم..

واهالينا أصحاب بساتين الفاكهة خاصة الزيتون والتمور والموالح بأنواعها ... اعرف ان التحجيم ضعيف السنة دس بسبب الصيف الساخن بزيادة .. وراعي ده في تقدير محصولك او في موضوع الفرز عشان مش هتلاقي احجام كبيرة ... ادينا بنقول من دلوقتي خاصة لبساتين البرتقال ... وبنقول كمان ان التلوين السنة دي للأسف برده هيتأثر بسبب تذبذبات الخريف المتوقعة في شهر نوفمبر القادم ان شاء الله ...

وما زلت بقول ان الزراعة المبكرة لها احتياطات وطقوس صارمة عشان ميحصلشي أي مشاكل ...

أهم نصيحة هي ... عليكم بالكبريت الزراعي إضافة مع التربة مع اسمدة التجهيز ... هيساعدك كتير قوي في الموسم الجديد ولكل المحاصيل ( حسب مقدرة الناس ) ...

دمتم طيبين وحفظكم الله وحفظ ارزاقكم جميعاً ...

ممكن تعمل مشاركة للكلام ده وتزود التفاعل شوية ... ممكن يعني ؟؟

دكتور محمد علي فهيم

27 أغسطس 2024

21 مسرى 1740

23 صفر 1446