الرئيسية / التوصيات

توصيات هامة خلال برمودة

2025/04/09

بيان هام جداً

إلى كل المزارعين .. برجاء التركيز

#وبدأ_برمودة_بأمطار_وبرودة

طبعاً معظم المزارعين في انتظار معرفة ايه اللي هيحصل للجو خلال الأيام اللي جاية وطول شهر برمودة (شهر دق على العمودة – اللي هو ضم وحصاد ودراس القمح في معظم الجمهورية تقريباً) ...

وللأسف دي فترة تذبذبات وتقلبات مناخية كبيرة وغريبة – بعد ارتفاعات كبيرة للحرارة هيبدأ يحصل انخفاضات كبيرة للحرارة خاصة حرارة الليل وهنرجع نسمع تاني مصطلح شديد البرودة ليلاً ( واحنا داخلين على نص شهر 4 ) ، وكمان زيادة في حدوث هبات الرياح القوية .. يعني محاصيل كتير هيحصل لها مشاكل للأسف ...

ولا زم نركز جدا جدا جدا ...

✍️ # عشان ري القمح المتأخر بعيد عن هبات الرياح العالية ...

✍️ # وعشان تقليع البطاطس الصيفي المنزرعة في شهر ديسمبر ...

✍️ # وعشان تقليع البنجر العروات المتأخرة..

✍️ # وعشان تقليع البصل والثوم ...

✍️ # وعشان حصاد الطبية العطرية (كمون – يانسون – كراوية – شمر – كسبرة – حش البردقوش والزعتر)

✍️ # وعشان بداية الجمع لمحاصيل الخضر الصيفية اللي بتجمع (الطماطم – فلفل – كوسة – باذنجان الخ) ..

✍️ # وعشان العمليات الزراعية الهامة لبساتين الفاكهة لاستكمال العقد بدون مشاكل ...

✍️ # وعشان زراعة محاصيل العروة الصيفية العادية (ذرة – سمسم – عباد شمس – قطن – فول سوداني ... الخ)

✍️ # وعشان زراعة العروة الصيفية لبعض المحاصيل الطبية العطرية زي الريحان والنعناع والعتر ...

✍️ # وعشان التعامل مع الخضر الصيفية سواء اللى كانت تحت الانفاق أو المكشوف ....

🔵🔵 #أولاً_ملامح_الطقس_المتوقع خلال الأيام القادمة...

🔵 بداية سيطرة وتوغل للكتلة الشمالية الباردة على كل الجمهورية لتزيح في طريقها كتلة الهواء الساخن لمنخفض السودان الموسمي المبكر ...

🔵 بداية من غداً الخميس 10 / 4 يسود طقس ربيعي طبيعي في معظم الجمهورية بدرجات حرارة حول الــ 20° شمالاً و 22 ° م وسط البلاد وحول الـ 28 ° جنوب البلاد ...

🔵 عودة البرودة ليلاً لتكون الحرارة حول الـ 12 ° م في الوجه البحري وحول من 15 – 19 ° م في الصعيد ... وخلال الأيام القادمة متوقع انخفاض اكبر في حرارة الليل لتلامس الـ 9 و 10 درجات مئوية .. ودي تمثل خطورة كبيرة جدا على أشجار الفاكهة في بداية الاخصاب والعقد ( معظم الفاكهة تقريباً ) ...

🔵 ثم تستمر الأجواء ربيعية مائلة للحرارة نهاراً وحتى نهاية الأسبوع القادم ان شاء ، يعني تذبذبات حرارية كبيرة – والكل عارف لما تزيد التذبذبات بتزيد التحديات على المحاصيل ...

🔵 خلال الأيام القادمة هتستمر هبات الرياح العالية المتقطعة نهاراً في معظم المناطق وبالتالي – ري القمح ( المتأخر) وعمليات الرش لكافة المحاصيل هتكون في توقيتات الهدوء او الاعتدال في هبات الرياح ( هننزل جدول هبات الرياح خلال الأسبوع اللى جاي ان شاء الله) ..

🔵 ومتوقع بعض الامطار الخفيفة على شمال الجمهورية بداية من غداً الخميس وبعض أيام الأسبوع القادم ( لكنها مناوشات خفيفة تقتصر على شمال الدلتا وشمال سيناء ) ...

🔵🔵 #أهم_الاحتياطات_والتوصيات ...

✍️✍️ مراعاة تجنب حصاد وضم القمح في التوقيتات اللى الرياح نشطة فيها ... ( الخميس – الجمعة – السبت – الاحد ) ..تابعوا الصفحة عشان جدول الرياح ...

✍️✍️مزارعي القمح ( اللى انزرع متأخر ) اللى دخل فى مرحلة الطرد أو فى مرحلة الطور اللبني - بالتالي هام جدا يكون فيه رطوبة ارضية كافية تحت النباتات ويتحط مع الرية دي نترات بوتاسيوم مع عالى ماغنسيوم (هام الماغنسيوم جدا) .. ( شوفو جدول الري)

✍️✍️ مراعاة عدم تقليع البطاطس والبصل والثوم والبنجر والكمون ... الخ في الأيام او المناطق اللى ممكن ينزل عليها بعض الامطار خاصة الكام يوم اللى جايين في المناطق اللى قلنا عليها ...

✍️✍️ ضبط الري تماماً لكافة المحاصيل المروية بالتنقيط أو الغمر لو جه ميعاد الرية على أن يكون في الفترة الصباحية .. ويفضل إضافة مركبات تنظيم الامتصاص (حامض الفولفيك + نترات ماغنسيوم + عالي الفسفور)

✍️✍️ الإضافة دي لكل المحاصيل فاكهة أو خضر عدا المحاصيل في النصف الأخير من عمرها (البطاطس فوق الـ 90 يوم والبنجر والبصل والثوم فى آخر العمر) ...

✍️✍️ رش أشجار المانجو مبكرة العقد والخوخ والطماطم وكل المحاصيل الثمرية بسليكات الالمونيوم النقية أو سليكات البوتاسيوم بمعدل 8 سم للتر .... وعدم رش اي مبيدات بما فيها الزيت المعدني تماماً .. وعدم الرش في توقيتات نشاط الرياح ...

✍️✍️ العمل على تقليل معدلات التنفيل فى المحاصيل الثمرية (التنفيل يعني تساقط العقد الحديث) زي الخيار والطماطم والفلفل والباذنجان والبامية ( اتباع الخطوات فى منشور التنفيل) ...

✍️✍️محاصرة تعداد بعض الآفات المرتبطة بالحرارة زي الحشرات القشرية والبق الدقيقي والعنكبوت الاحمر وباقي الحشرات حرشفية الاجنحة زي دودة ورق القطن والديدان الثمار... ولازم يكون فيه مراقبة ورصد مستمر للزراعات ...

✍️✍️اجراء رية هامة جداً لزراعات القصب سواء غرس ربيعي او خلفة ونحط مع الري 4 ك نترات ماغنسيوم وده اجراء مهم للقصب ..

✍️✍️مزارعي البصل والثوم لازم تكثيف الرش بمركبات التحجيم زي سترات البوتاسيوم وسلفات البوتاسيوم ...

✍️✍️مزارعي الفاصوليا الصيفي -- الرش ضد المن والتربس لانهم هيزيدو بسبب الجو المتذبذب المتقلب (شوفو منشور الفاصوليا) ... ولازم حقن مبيدات اعفان الجذور مع اقرب رية (مون كت 400 جم + 500 جم توبسين ) ...

✍️✍️مزارعي الموالح ... الرش الوقائي العاجل ضد لفجة الازهار والانثراكنوز والحشرات القشرية (الرش باكروبات منكوزيب مع ازوكسي استروبين) ...

✍️✍️ الوقاية من مجموعة الامراض المحبة للرطوبة الحرة زي البياض الزغبي على الخضر والدقيقي على المانجو والخوخ والتبقعات واللفحة النارية على التفاح والكمثرى واللطعة الارجوانية على البصل والتوم وانراض الفراولة المحبة للحرارة العالية ... الخ ... ولازم نكون جاهزين ببرامج الرش المناسبة.

دمتم طيبين ،،،

==============ءء

برجاء توصيل التوصيات دي لأكبر عدد ممكن من المزارعين ..

المطلوب دلوقتي تعمل شير على اوسع نطاق للكلام ده خلي الناس تستعد ..

#اعمل_متابعة_الصفحة...

==============ءء

أستاذ دكتور / محمد علي فهيم

رئيس مركز معلومات تغير المناخ

مركز البحوث الزراعية

1 برمودة 1741

9 ابريل 2025

11 شوال 1446

مصدر التوصية