الرئيسية / التوصيات
أجواء الأسبوع ( 11 إلى 15 أغسطس ) ... إن شاء الله ..
2024/08/11
-
-
صباح الخيرات على أغلى وأصدق وأفضل الناس ...
باختصار شديد ...
حبيت اطمنكم على أجواء الأسبوع ده ( 11 إلى 15 أغسطس ) ... إن شاء الله ..
@@ ونتيجة لسيطرة أكيدة لمرتفع العروض الوسطى واللى بيدفع بكتل هوائية شمالية تعمل على تلطيف الأجواء خاصة في الليل والصباح الباكر ، وتكسر شوية حدة الصهد والحر ده ... بس الرطوبة هتكون مرتفعة وده هيشكل الندى بغزارة على الزرع ... يعني تخلى بالك من الامراض المحبة للرطوبة العالية ...
@@ ده يخلي المناخ مناسب لشتل أو تطعيم الفاكهة ( مانجو ، موالح ، زيتون ، نخيل ... الخ) ..
@@ وكمان زراعة عروة الخضر الجديدة ( طماطم ، فلفل ، كرنب ، .. الخ ) ...
@@ والجو مناسب تدخل بمركبات التحجيم ( البوتاسيوم ) للزيتون والتمور والكمثرى والموالح ... الخ ..
@@ ضروري ندخل بمحفزات النمو ( أحماض امينية وطحالب وسيتوكينين) للمحاصيل اللى تأثر نموها بالموجة الحارة الطويلة ( مثل الأرز والذرة المتأخرة وبعض الخضر حديثة الشتل ... ) ..
@@ سرعات عالية من الرياح .. عشان كده نخلي بالنا من موضوع ري المحاصيل الطويلة ( الذرة والسمسم وعباد الشمس) ...
@@ وبرده ما تستعجلش في زراعة العروة النيلية ( بطاطس – بنجر عروة أولى – توم – مشاتل بصل – فاصوليا بيضا ... الخ ) عشان ما ترجعشي تزرعهم تاني لان الأجواء لسه سخنة ...
@@ معالجة مشكلة التفاف الاوراق لأعلى للخضر ( خاصة الطماطم والفلفل ) بسبب الحرارة العالية ، وهي لها 4 خطوات موجدين فى منشور مفصل على الصفحة تحت اسم "التفاف الاوراق الفسيولوجي" ...
@@ افحص زرعك كويس عشان دي ظروف مناسبة لظهور الامراض الفطرية والبكتيرية المحبة للرطوبة والأجواء الحارة ( تبقعات ولفحات الخضر والبياض الزغبي على الريحان واعفان الجذور والانثراكنوز على محاصيل كتير ) ...
اخيراً ... لو عندك حاجة عاوز تقولها ؟؟؟ ايه شاغلك فى الفترة دي ومخليك متحير .. قول يمكن اقدر اساعدك ... !!
دمتم طيبين محترمين
دكتور محمد علي فهيم
١١ اغسطس 2024
4 مسرى 1740
6 صفر 1446
- مصدر التوصية
