الرئيسية / التوصيات

#25_تحذيــر_زراعــــــــي ...

2025/02/09

دائماً بنقول إن لكل موسم خصوصيته في أنماط المناخ والموسم ده النمط الأبرز هو التقلب الكبير في أنماط الحرارة وزيادة فرق حرارة الليل والنهار ( فترة دافئة يليها فترة باردة ثم شديدة البرودة ثم صقيع خفيف وهكذا ..)

وكمان يعتبر موسم جاف جداً من ناحية الامطار ...

زاد عليهم تشكل الشبورة الكثيفه لحد ضباب ودي طبعا لها علاقه كبيره مش بس بالأمراض ولكن العلاقة كبيره جدا بانخفاض كبير في معدلات الامتصاص وده باين على محاصيل كثيره اليومين دول..

وأتكلمنا كتير على موضوع البرودة المتأخرة وموضوع العشرة السلف من طوبة لأمشير ، وفي ظل سيطرة المنخفض شديد البرودة والتدرج والتذبذب فى انخفاض الحرارة ليلاً خلال هذه الفترة وتستمر حتى منتصف شهر أمشير على الأقل ...

وهنا بقه ...

وجب علينا ان نستجيب للتحذيرات وننفذ التوصيات التالية :

#تحذيرات_يتبعها_توصيات ...

#التحذيـــــــر_الــ1:

#القمح : عدم التأخير للريات خلال الفترة دي خاصة للمح المتأخر لانه مش هيعمل قش ويكون محصول ضعيف ... والناس تفحص غلتها كويس عشان الصدأ ده وقته وظروفه .. ومفيش رش وقائي .. وممنوع استخدام مبيدات الحشائش في العمر اكبر من ٤٠ يوم ... ونفحص الغلة اللى داخلة على طرد عشان موضوع المنّ ولو ظهر يترش فوراً ( اسيتامبريد + لمبادا5%)

(( رحم الله الدكتور عبد السلام المنشاوي رحمة واسعة )) ...

#التحذيـــــــر_الــ2:

#الفاصوليا_الصيفي : محدش يزرع فاصوليا صيفي قبل 12 – 15 فبراير والزراعة بشروط صارمة (هتلاقوها في منشور الفاصوليا الصيفي) ...

#التحذيـــــــر_الـــ3:

#البنجر : محدش يصرف في البوتاسيوم للبنجر اكبر من 140 يوم زيادة عن اللزوم .. ويرش بورون 14 ٪ مرتين .. عشان موضوع السكر الكاذب.

#التحذيـــــــــر_الـــ4:

#البطاطس_الشتوي: محدش يضيف اي منظمات نمو البطاطس بعد 90 يوم عشان التحجيم .. فقط البوتاسيوم والكالسيوم.

#التحذيـــــــــر_الــ5 :

#البطاطس_الصيفي: محدش يروي البطاطس مرتين ورا بعض بدون عزيق لاي سبب .. وممنوع استخدام اليوريا والدفعة الأولي من التسميد يفضل أن تكون 3 سلفات نشادر او 2 نترات نشادار بنظام خط وخط.. استخدام اليوريا بكثرة بيسبب أنها في سنوات اللفحة بتبدأ من الأرض دي أو زيادة تشقق الدرنات في الأصناف الحساسة أو زيادة الإصابة بالمّن ... الخ

#التحذيــــــــر_الــ7:

#الفراولة: محدش يكتر استخدام الاحماض الامينية تماما .. دي فترة العفن الرمادي والعفن الطري وتجدد الإصابة بالتبقعات وخاصة بعد انتهاء ايام الشبورة البرد وزيادة الندي... والمهم ان اتلحجيم والتلوين يضعف مع البرودة ولازم التدخل العاجل ...

#التحذيــــــــر_الــ8:

#المانجو: محدش يزيل الافرع الجافة دلوقتي حتي يحدث جريان العصارة في الأشجار ... ويجب الانتهاء من تقصيف نسبة من الازهار للجيل الاول علي نهاية الاسبوع عشان تعمل اكتر من جيل على الشجرة ..مع الرش الوقائي الهام جداً ضد البياض الدقيقي خاصة في الشيح المبكر...

#التحذيــــــر_الــ9:

#الفول: محدش يرش اي نحاسيات أثناء التزهير والعقد .. مع الرش الوقائي ( ازوكسي ستروبين + مانكوزيب) ضد التبقعات واجراء كل إجراءات الحد من التنفيل ( شوف منشور تنفيل الفول)

#التحذيـــــــر_الــ10:

#البصل: اوعى تنسى رشة وقائية هامة ضد الامراض الفطرية متستعجلوش رش المغذيات المكثف علي البصل .. الكالسيوم مكون أساسي في التسميد والتغذية خاصة بعد صدمة مبيدات الحشائش ..

#التحذيــــــــر_الــ11:

# الثوم: متستعجلوش رش الكالسيوم بورون دلوقتي ... وخليك في البوتاسيوم فوسفيت والماغنسيوم فوسفيت شوية ...والرش الوقائي اللى لا يحتمل التأخير ضد اللطعة الارجوانية ( هي دي ظروفها)...

#التحذيــــــر_الــ12:

#الخرشوف: اللي لازق وبيأخر الجمع قوي والورق بتاعه أبيض والنورة ( الكوز) ضعيف وتحجيمه خفيف.. ما ترشوش اي احماض امينية أو منشطات .. فقط كالسيوم فوسفيت وسترات بوتاسيوم... واهتم قوي بمركبات التحجيم الآمنة ( سترات /اسيتات/نترات البوتاسيوم مع سيتوكينين 4% ...

#التحذيــــــر_الــــ13:

#الكتان: اياك وزيادة التسميد الازوتي ، لان القش ضعيف واللون باهت والتفريع ضعيف ( بسبب البرودة) وعليه الاهتمام جداً بمحفزات النمو وتنشيط الامتصاص ، ولان ده وقت الامراض الفطرية ( الصدأ والبياض الدقيقي) فبنحذر من زيادة الرش بالاحماض الامينية ، مع تكثيف الكالسيوم فوسفيت وسترات بوتاسيوم...

#التحذيــــــر_الـــ14:

#الكمون_اليانسون_الشمر: التحذير الشديد من امراض الالترناريا والتبقعات والذبول ( ده ظروفهم) وتكثيف إضافة الفسفور بالتبادل مع الكالسيوم فوسفيت وسترات بوتاسيوم... والتحذير من الإصابة بالتربس في الكمون والمنّ في الشمر ...

#التحذيـــــــر_الـــ15:

#البرسيم: محدش يأخر الحشة الحالية واخلصو من الوش ده بدري عشان النبات يفوق بعد موجة البرد مع إضافة حامض فسفوريك مع الرية اللي جاية 10 لتر.

#التحذيـــــــــر_الـــ16:

#العنب_المبكر : عدم زيادة الأسمدة البوتاسية الفترة دي والعناية الفائقة بعالي الفسفور والكالسيوم ( من دلوقتي لان الكالسيوم لا يخزن ولازم إضافات حية) ... ولو فيه عيون بدأت تتفتح رش بالكبريت الميكروني عالطول ..

#التحذيـــــــــر_الـــ17:

#الخوخ_و_البرقوق: اوعى تطول الفترة بين الريات تحت اى بند ، قصر الفترة بين الريات واعطي ريات خفيفة على فترات قصيرة ، واتبع خطوات الحد من التساقط الغزير للزهر او العقد الحديث ( هيكون فيه تساقط غزير الموسم ده فوق الطبيعي) ...

#التحذيـــــــــر_الـــ18:

#الموالح: لا تأخر المعاملة ياليوريا من 1 – 1.5% ( هي دي وقتها) ، وقبلها يجب الانتهاء تماماً من التقليم والرش بالزيوت المعدنية الشتوية والحشري ... والاهم أهمية الحقن بمبيدات اعفان الجذورة والتقرح (“الميتالاكسيل، فوستيل الألومنيوم، هيدروكسيد النحاس، أو أوكسي كلور النحاس”)

#التحذيـــــــــر_الـــ19:

#الزيتون: خلينا نعرف ان الزيتون اخد احتياجات البرودة بتاعته بانتظام ومتوقع موسم تزهير كثيف وتقيل وعليه التحذير من زيادة إضافة البوتاسيوم الفترة دي ، لان موسم التزهير احتمال يطول في الوقت ومهم جداً والتعامل مع اى تزهير مبكر بمركبات الكالسيوم /بورون أو البورون / الموليبدنيوم مع اقتصار مصدر الازوت على نترات الكالسيوم او سلفات النشادر ......

#التحذيـــــــــر_الـــ20:

#خضر_الانفاق_البلاستيكية: الفترة دي حرجة جداً لخضر الانفاق وممكن اى خطأ في مواعيد كشف البلاستيك يعمل صدمة للزرع ، والمطلوب زيادة فترات التهوية لبلاستيك الإنفاق والتغطية المحكمة ليلا ... مع أهمية إضافة عالى الفسفور مع الفولفيك مع الري ..واللى رفع البلاستيك خالص يبدأ يكثف من عالي الفسفور مع الفولفيك ويا ريت يخش بمنقوع الطاقة .....

:

#التحذيـــــــــر_الـــ21:

#القصب_الخلف_و_الغرس: الفترة دي حرجة للقصب بسبب ان الصعيد يواجه انخفاض كبير في الحرارة بالتالي المهم جداً عدم تأخير الريات ، والموسم ده هنزود إضافات الفسفور جداً مع العناية قوي بالرش ضد الحشرات القشرية بدري بدري ...

#التحذيـــــــــر_الـــ22:

#محاصيل_العروة_الصيفية_المبكرة: محدش يستعجل زراعة العروة الجديدة سواء ذرة بدري او لب او خضر مكشوف ننتظر حتى بعد 15 فبراير مع زيادة إضافة السوبر والكبريت الزراعي مع التجهيز ...

:

#التحذيـــــــــر_الـــ23:

#مزارع_المواشي: محدش يزود من التغذية علي برسيم اليومين دول عشان نقص الفسفور علي المواشي وظهور البول المدمل...

#التحذيـــــــــر_الـــ24:

#مزارع_الدواجن: لا ترفع درجات التأهب للبرودة لان لسه قدامنا شوية وكتر من الاحماض الامينية في العليقة والفيتامينات والاستعداد للرياح المحملة بالغبار والاتربة.

#التحذيـــــــــر_الـــ25:

#مزارع_الأمهات_السمكية: محدش يغير المياه العميقة بتاعة الأحواض تحت البلاستيك ويكتفي بتغيير المياه السطحية بس مع تكثيف حمامات المضادات الحيوية.

#هام_جداً :

((ده وقت تجهيز واضافة منقوع الطاقة ( كل تفاصيل اعداد وتجهيز المخلوط والمعدلات والمكونات وكل حاجة في منشور مفصل على الصفحة)) ...

زي ما انتم شايفين عشان نقدر نغطي كل المحاصيل بيحتاج جهد كبير جداً ودقة وامانة شديدة في كل كلمة بتنكتب لكل محصول ..

يبقى تابعوني ربنا يهديكم...

الصفحة عليها 180 الف متابع .. أثبتوا نفسكم هنا ...

اعمل مشاركة لكل الناس ... يعني عاوز اشوف ال 180 ألف متابع ( بلاش تكبر وانانية من البعض) ... مش عيب تقول رأيك وتعبر عن كينونتك على الصفحة .. تواضع ...

دكتور محمد علي فهيم

9 فبراير 2025

2 أمشير 1741

10 شعبان 1446

مصدر التوصية